საქართველოს სათამაშო ბიზნესის ასოციაციასა და აჭარის სამორინეთა ასოციაციას შორის მემორანდუმი გაფორმდა. 22 ნოემბერს ხელმოწერილი დოკუმენტით  მხარეები თანხმდებიან, რომ თავიანთი საქმიანობის ფარგლებში მათ აქვთ ურთიერთსასარგებლო ინტერესები, რომელთა გატარებას ერთობლივი მოქმედებებით შეეცდებიან.

მემორანდუმის თანახმად,  საქართველოს სათამაშო ბიზნესის ასოციაციისა და აჭარის სამორინეთა ასოციაციის თანამშრომლობის  მიზანია, ბიზნესგარემოს გასაუმჯობესებლად საკანონმდებლო ინიციატივების შემუშავება. ასევე,  სათამაშო ბიზნესთან დაკავშირებით არსებული და სამომავლოდ ასამოქმედებელი რეგულაციების შეფასება, ანალიზი და განვითარების ხელშეწყობა;  სათამაშო ინდუსტრიისა და ვაჭრობის ფარგლებში  საქმიანობის მაღალი სტანდარტების დანერგვა.

დოკუმენტში ხაზგასმულია, რომ ორივე მხარისთვის მნიშვნელოვანია, აზარტულ თამაშებთან დაკავშირებით  ერთიანი პოზიციის ჩამოყალიბება და საერთო პოზიციით წარდგენა სახელმწიფო ორგანოების, იურიდიული სუბიექტებისა თუ საერთაშორისო ორგანიზაციების წინაშე.