მართლმსაჯულების ევროპულ  სასამართლოში (CJEU) მიმდინარე პროცესებს iGaming ინდუსტრიის წარმომადგენლები განსაკუთრებული ყურადღებით აკვირდებიან. სასამართლომ 19 ნოემბერს უნდა გამოიტანოს გადაწყვეტილება მალტის საკამათო „კანონპროექტი 55“-თან (Bill 55) დაკავშირებით.

2023 წლის ივნისში მიღებული კანონპროექტი მალტის სათამაშო საქმიანობის შესახებ კანონში (Maltese Gaming Act) 56A მუხლის დამატებას ითვალისწინებდა. ეს დებულება მალტის სასამართლოებს გაათავისუფლებს უცხოური სასამართლო გადაწყვეტილებების აღიარებისა და აღსრულების ვალდებულებისგან. ეს ეხება ისეთ შემთხვევებსაც, როდესაც ოპერატორი სხვა ევროკავშირის ქვეყანაში საქმიანობს შესაბამისი ლიცენზიის გარეშე, მიუხედავად იმისა, რომ მსგავსი საქმიანობა მალტის კანონმდებლობით ნებადართულია.

Bill 55-ის გარშემო დებატები უკვე რამდენიმე წელია მიმდინარეობს. ერთ-ერთი მთავარი სადავო საკითხია იმ ოპერატორების წინააღმდეგ გამოტანილი სასამართლო გადაწყვეტილებების აღსრულება, რომლებიც საქმიანობენ ე.წ. ნაცრისფერ და შავ ბაზრებზე. საუბარია როგორც იმ ოპერატორებზე, რომლებიც რეგულირებულ იურისდიქციებში სათანადო ლიცენზიის გარეშე მოქმედებენ, ასევე მათზე, რომლებიც აზარტული თამაშების აკრძალვის მქონე ტერიტორიებზე სთავაზობენ მომხმარებლებს მომსახურებას.

ინდუსტრიის არაერთმა წარმომადგენელმა უკვე გამოხატა Bill 55-ის მიმართ უარყოფითი პოზიცია. კანონპროექტის ერთ-ერთი კრიტიკოსია გერმანიის სათამაშო საქმიანობის მარეგულირებელი, ფედერალური მიწების ერთობლივი სათამაშო მარეგულირებელი ორგანო (GGL).

საქმის განხილვამ ვენის კომერციულ სასამართლოში (Handelsgericht Wien) ევროკავშირის მართლმსაჯულების სასამართლოსთვის მიმართვის აუცილებლობა წარმოშვა. სასამართლოს უნდა განეხილა კითხვები, რომლებიც Bill 55-ის ევროკავშირის კანონმდებლობასთან შესაბამისობას ეხებოდა. ავსტრიის სასამართლოებმა მანამდე მოთამაშეთა სასარგებლოდ მიიღეს გადაწყვეტილებები, რადგან მიიჩნიეს, რომ უცხოელი ოპერატორების საქმიანობა ქვეყანაში უკანონო იყო.

საქმის განხილვისას მალტის სასამართლოებმა თავისუფალი ბაზრის პრინციპებსა და ევროკავშირის იმ წესებზე გაამახვილეს ყურადღება, რომლებიც მომსახურების თავისუფლად მიწოდების უფლებას უზრუნველყოფს. ამ არგუმენტებზე დაყრდნობით, მათ ავსტრიის სასამართლოს თავდაპირველი გადაწყვეტილების სამართლებრივი ძალა არ აღიარეს.

აპრილში Bill 55-ის მიმართ კრიტიკა კიდევ უფრო გაძლიერდა მას შემდეგ, რაც ევროკავშირის მართლმსაჯულების სასამართლოს გენერალურმა ადვოკატმა, ნიკოლას ემილიუმ (Nicholas Emiliou), საკუთარი მოსაზრება გამოაქვეყნა. მისი შეფასებით, კანონპროექტის კანონიერებასთან დაკავშირებით წინასწარი გადაწყვეტილების მიღების მოთხოვნა დაუშვებელი იყო და ავსტრიის სასამართლოებში მიმდინარე საქმის გადასაწყვეტად აუცილებლობას არ წარმოადგენდა. ამასთან, ემილიუს განცხადებით, Bill 55 ეწინააღმდეგება ევროკავშირის წესებს, რომლებიც სხვა წევრი ქვეყნების სასამართლო გადაწყვეტილებების აღიარებასა და აღსრულებას არეგულირებს.

გენერალურმა ადვოკატმა ასევე ხაზი გაუსვა, რომ ევროკავშირის წევრი ქვეყნების სასამართლოების მიერ გამოტანილი გადაწყვეტილებები, რომლებიც მოთამაშეებს მალტაში ლიცენზირებული ონლაინ აზარტული თამაშების ოპერატორების მომსახურებაზე წვდომას უზღუდავს, უნდა იყოს აღიარებული არა მხოლოდ მალტაში, არამედ ევროკავშირის სხვა წევრ ქვეყნებშიც.

iGaming ინდუსტრიის წარმომადგენლები ახლა ევროკავშირის მართლმსაჯულების სასამართლოს გადაწყვეტილებას ელოდებიან, რომელიც 19 ნოემბერს არის დაგეგმილი. საქმის შედეგმა შესაძლოა მნიშვნელოვანი გავლენა მოახდინოს ევროპაში ონლაინ აზარტული თამაშების ბაზრის მომავალ განვითარებაზე და განსაზღვროს, თუ როგორ მიუდგებიან ევროპული სასამართლოები მალტის Bill 55-ს.


წყარო


#რეგულაციები #მალტა #ოპერატორები #ევროკავშირი #სათამაშობიზნესი #სამართალი