სექტემბერში ლისაბონში Legends Charity Game გაიმართება, სადაც მსოფლიოს საფეხბურთო ვარსკვლავები თანხების მოსაგროვებლად შეიკრიბებიან, რათა ომებისა და კონფლიქტების შედეგად დაზარალებულ ოჯახებსა და თემებს დახმარება გაუწიონ.

ეს მატჩი, რომელიც ემთხვევა SBC Summit-ს ლისაბონში, ჩატარდება ორშაბათს, 15 სექტემბერს. Portugal Legends და World Legends შორის გამართული თამაში ერთ-ერთი ყველაზე გამორჩეული ღონისძიებაა, სადაც ფეხბურთის ისტორიის უდიდესი ვარსკვლავები შეიკრიბებიან. ლეგენდები 60,000 გულშემატკივრის წინაშე ითამაშებენ სტადიონზე, ხოლო მილიონობით ადამიანი მატჩს ტელევიზიით ან ონლაინ უყურებს.

პორტუგალიის ფეხბურთის ფედერაციის (FPF) მხარდაჭერით, პორტუგალიელი ლეგენდები მსოფლიო ვარსკვლავების წინააღმდეგ ითამაშებენ. ღონისძიების მიზანია 1 მილიონ ევროზე მეტი თანხის შეგროვება ოჯახებისა და იმ თემებისთვის, რომლებიც მძიმე სოციალურ მდგომარეობაში იმყოფებიან.

პორტუგალიის ლეგენდების გუნდს ლუიშ ფიგუ უკაპიტნებს, რომელმაც კარიერის განმავლობაში ევროპის სხვადასხვა კლუბთან ერთად ბალონ დ’ორიც მოიპოვა 2000 წელს. ფიგუ ამბობს:

„ყოველთვის სასიამოვნოა ჩემს ქვეყანაში დაბრუნება  და თამაში, განსაკუთრებით მაშინ, როცა ეროვნულ გუნდის ფერებს ვიცვამ. იმედია, ჩემი მშობლიური ქალაქის, ლისაბონის, სტადიონი სავსე იქნება ამ შესანიშნავი საქველმოქმედო მატჩისთვის და ერთად მოვაგროვებთ თანხებს მნიშვნელოვანი საქმეებისთვის.“

ფიგუსთან ერთად ითამაშებენ ევრო 2016-ის გამარჯვებული გუნდის წევრები – რიკარდო კვარეჟმა, ელისეუ და რიკარდო კარვალიო. ჩემპიონთა ლიგის გამარჯვებულებიდან მოედანზე იქნებიან ფაბიო კოენტრაო, მანიშე, ჰუგო ალმეიდა, ვიტორ ბაია, ჟოზე ბოსინგვა და დეკო. ასევე ითამაშებენ ბეტო, ჟორჟე ანდრადე, დანი, ტიაგუ მენდეშ, ელდერ პოსტიგა, ნუნუ გომეში და სიმაო. გუნდს კიდევ ერთი ჩემპიონთა ლიგის გამარჯვებული – კოსტინია უხელმძღვანელებს.

მსოფლიო ლეგენდების გუნდში კი იქნებიან: პეტერ შმეიხელი (დანია), კაფუ (ბრაზილია), ხავიერ ძანეტი (არგენტინა), დიეგო ლუგანო (ურუგვაი), ლეონარდო ბონუჩი (იტალია), გაისკა მენდიეტა (ესპანეთი), იური ჯორკაეფი (საფრანგეთი), ქრისტიან კარამბე (საფრანგეთი), მარეკ ჰამშიკი (სლოვაკეთი), გიორგოს კარაგუნისი (საბერძნეთი), კრასიმირ ბალაკოვი (ბულგარეთი), გიორგე ჰაჯი (რუმინეთი), ედვინ ვან დერ სარი (ნიდერლანდები), ჰენრიკ ლარსონი (შვედეთი), შოთა არველაძე (საქართველო), ხავიერ სავიოლა (არგენტინა) და რონალდინიო (ბრაზილია).

მატჩი 60,000 მაყურებლის წინაშე გაიმართება ან Estádio da Luz-ზე (ბენფიკას სტადიონი), ან José Alvalade-ზე (სპორტინგ ლისაბონის სტადიონი), ხოლო ზუსტი ადგილი აგვისტოში, ჩემპიონთა ლიგის განრიგის გამოქვეყნების შემდეგ გახდება ცნობილი.

ერთ-ერთი საერთაშორისო ორგანიზაცია, რომლის მხარდასაჭერადაც ღონისძიება იმართება, არის უკრაინის წითელი ჯვარი. უკრაინის წითელი ჯვრის გუნდები ყოველდღიურად ეხმარებიან ადამიანებს ევაკუაციაში, ფსიქოსოციალური და პირველადი დახმარების გაწევაში, ჰუმანიტარული ტვირთის განაწილებაში, დროებითი თავშესაფრების ორგანიზებაში, საცხოვრებელი სახლების აღდგენასა და UXO (არ აფეთქებული საბრძოლო მასალების) შესახებ ინფორმირების გავრცელების კამპანიებში.

უკრაინის წითელი ჯვრის გენერალური დირექტორი მაქსიმ დოცენკო ამბობს:
„ომი უკრაინაში გრძელდება და სამწუხაროდ, მილიონობით ადამიანს ყოველდღიური მხარდაჭერა სჭირდება. ასეთ დროს გაჩერების უფლება არ გვაქვს. Legends Charity Game-ის მსგავსი ინიციატივები მხოლოდ შეგროვებული თანხებით არ იზომება – ისინი გამოხატავენ თანაგრძნობას და იმ გაგებას, რომ მსოფლიო ჩვენს გვერდით დგას. ეს სოლიდარობა რეალურ დახმარებად გადაიქცევა იმ ადამიანებისთვის, რომლებიც ურთულეს პერიოდს გადიან. მადლობას ვუხდით ყველას, ვინც ამაში მონაწილეობს.“

პორტუგალიის საქველმოქმედო პარტნიორი იქნება ლისაბონში დაფუძნებული Cáritas Portuguesa, რომელიც მხარს უჭერს მოწყვლად ჯგუფებს სიღარიბესთან და კრიზისულ მდგომარეობებთან ბრძოლაში.

SBC-ის დამფუძნებელი და CEO რასმუს სოჯმარკი აღნიშნავს:
„ჩვენი საქველმოქმედო საქმიანობა წელს ახალ დონეზე გადაგვყავს ამ გრანდიოზული საფეხბურთო მატჩის საშუალებით, რათა მნიშვნელოვანი საქმეებისთვის რაც შეიძლება მეტი თანხა შევაგროვოთ. SBC Summit-ის იმავე კვირაში ჩატარებით, შევძელით ერთმანეთთან დაგვეკავშირებინა ფეხბურთისა და ბიზნესის საზოგადოებები, რათა დაეხმარონ ადამიანებს, რომლებიც წარმოუდგენელ სირთულეებს აწყდებიან.“

ბილეთების შეძენა შესაძლებელია ოფიციალურ ვებგვერდზე www.legendscharitygame.com. ღონისძიების ბილეთების მართვას See Tickets უზრუნველყოფს.

სპონსორობისა და მასპინძლობის პაკეტები ჯერ კიდევ ხელმისაწვდომია ღონისძიებისა და მისი საქველმოქმედო პარტნიორების მხარდასაჭერად. უკვე დადასტურებულ სპონსორებს შორის არიან iGP, Soft2Bet, Sportingtech, Vegas Legends, Spribe, SmartSoft და Alea.

Sport Global Charitable Foundation არის Prism the Gift Fund-ის (დიდ ბრიტანეთში რეგისტრირებული საქველმოქმედო ორგანიზაცია ნომრით 1099682) დაქვემდებარებული ფონდი. Legends Charity Game-ის მთელი მოგება გადაეცემა Sport Global Charitable Foundation-ის მიერ შერჩეულ საქველმოქმედო ორგანიზაციებს, მათ შორის უკრაინის წითელ ჯვარსა და Cáritas Portuguesa-ს.

წყარო